قصة حياتي مختصره ( الي يدخل يتحملني ) !!!

السلام عليكم ورحمة الله وبركاااااااااااته

نبذه عن حياتي ::

بدايه احب اعرفكم بنفسي انا خولة عمري 19 سنه تخرجت من الثانوية العام الماضي
وبعد التخرج باسبوعين تزوجت ومن هنا بدت معاناتي ( استغفر الله):eek: ,,,

بحكم الدراسة وبحكم اني من الاوال بدراستي كنت ما افكر الا بالدراسة وكل احاتي نتايجي

اخاف اصير برى الثلاث الاوال حتى لما انخطبت الخطوبة ما اثرت فيني كثير نفس ما انا

ما افكر الا بالنجاح وكنت سنة ثالث ثانوي يعني سنت النسبة حتى خطيبي سافطته

عدل ولا احاتي الزواج كثر النسبة ...

طبعاً انا ما ادبر شئ بشغل البيت ولا افهم شئ كل شئ ميح فيه ( ما ادبر شئ ) ,,,

تزوجت بعد الامتحانات وبعدها سافرت وللاسف فاتني التسجيل بالجامعة

وجلست ايام وايام وايام زعلالالالالالانه على التسجيل الي طافني بعدها

الكل قالي ان شاء الله تنقبلين السنه الجااااااااااااايه قلت ان شاء الله ,,,,

بعدها لقيت نفسي ضااااااااااااااااااااااااااااااااايعة انا الي منظم حياتي الدراسة

انا مع الدراسة عشرت عمر صار لنا 12 سنه مع بعض يعني اكثر من نص عمري الحالي

الحين ما اعرف شئ غير الدراسة ماعندي علاقات اجتماعية كثيرة ولا اعرف شئ

بامور الزواج ولا شئ بالطبخ والتنظيف والغسيل ولا عندي سوالف غير الدراسة والتسجيلات

والدرجات والنجاح والتفوق اما في الحيااااااااة زيرو يعني صفر:cry: ,,,,


المهم والي زاد الطين بله اني ساكنه بشقة لحالي لو مع اهل زوجي يساعدوني حمياتي

بس لحالي ما ادبر شئ ,,,

انا علاقتي مع زوجي تمام لانه ولد عمي ومن زمان اهو قال يبيني وبيتزوجني بعد الثانويه

بس انه يبيني بس مافيه بينا اي حب ولا شئ قبل الزواج وانا بالنسبة لي ماياخذ قلبي

الا الي يعقد قرانه علي والله اني حبوبة ومتفهمه وعااااااااقلة ورزينه وزوجي يمووووووت

فيني بس احس اني عايشه بدون هدف وكل وقتي نووووووم وسهر ونت وتلفزيون بس

لا اطبخ كل من بره نادر اسوي بيض او همبرغر او اي شئ مش حالك ملابس زوجي

ياكثر الي خربتهم ودمرتهم وعلى الزباله على طول مسح ما امسح والحمامات الله يعزكم

اغسلهم بس بالماء واكنس بس هذا شغلي حتى الكوي في المغسله ,,,


زوجي احسه ساكت عني وصابر علي صبر المر والله يعينه احسه متحمل كل شئ
يس في شئ وحيد متضايق منه واهو اكثر شئ تاعبه مني ان ما اعرف امور في
( الحياة الجنسية ) وما احس اني ارغب لها كثير يعني او ماتزوجت جاملت على شانه
بس بعدين ما احب اكثر من مره بالاسبوع وزوجي لو الود وده في اليوم مرتين
وغير كذا ودي اصير فاهمه في هالامور يعني ابغى اسعد زوجي من هالجهه
رغم ان اهو يريحني اذا نمت معاه بس انا احس ان مره بالاسبوع تكفيني والله محتااااااااااسه
حدي ماعندي خوات اكبر مني ولا اعرف شئ بعالم النت على شان استفيد والوالده
مو من النوع الي تحب تعلم او من هالقبيل تقول كل واحد يجرب بنفسه
كل شئ صار تجااااااااااااااارب بحياتي هذي اكثر نقطة ترفع ضغط زوجي بالحييييييييل
يقول الكوي اوديهم المغسلة والطبخ الله يخلي المطاعم والترتيب اجيب
شركه ترتبها اسبوعياً بس انا احتاجك كزوجة وصديقة يقول لي انتي اكثر من رائعة بالصداقة
اقدر افتح لك قلبي على طوووول بس قلت له : وشو بس ؟؟؟ قال: ابغى احسك احلى زوجة بالدنياااااااا كلها

ومن هنا انا بدائت جدياً في هالامر وقلت لازم ارضي زوجي واسوي واجباتي
بالذات ان زوجي يحبني ومدلعني ويمدحني ومو مقصر علي باي شئ والله يستاهل بعد قلبي ,,,


وبعد النبذه عن حياتي بعطيكم نبذه عن شقتي ,,,

شقتي تتكون من غرفتين وحمامين وصاله ومجلس ارجال ومطبخ...

غرفة نومي :: وتحتوي على سرير ودولاب وتسريحة وكنبتين مع طاوله صغار واهي سرميك
وبالوسط سجاد كشكل للغرفة وستارة وشماعة للملابس ,,,


الغرفة الثانية :: وبما اني ماعندي اطفال مستقلة هالغرفة وحاطه فيها الكوايه والمنشر للملابس
والمكنسه وبعض الكراتين والسلال الي احتاجهم وطبعاً سرميك ,,,

الصالة :: تحتوي على طقم كنب ومكتبه كبيرة او نمليه او أي شئ تسمونها وقطعت زل في الوسط
وفيها شجرة صناعية كلها ورد وعلى الجانب الثاني فيها تحفه كبيرة وستارة طبعاً
وبس ,,,

المطبخ :: مجلى للغسيل صغيرة مره وفيه ثلاجه من ( ال جي ) وفيه فرن على غاز وفيه براد للماء

وفيها مثل الخزانه صغيره مره للعزبه والاواني وميكرويف وفيه طاوله صغيرة تساعدني على مكان لصحون ,,,

المدخل للبيت :: بحكم انه شقه فهو صغير نوعا ما ومايحتمل احط فيه اغراض كثيره فاكتفيت
باني احط فيه كشوان لنعل بس ( الله يكرمكم) وعليه علبة مع غطاها احط فيها المفاتيح وما الى ذلك

المجلس بحمامه :: لهم مدخل خاص محذووووووفين من حياتي امرهم مره بالشهر لان المجلس

لسى ما اثثناه ومافيه ولاشئ والحمام مافيه احد يستعمله ابداً ,,,

وهذي اهي شقتي ,,,

طيب انا في راسي الف سؤال وسؤال والله يعينكم على اسئلتي ,,,

# النظافة والتنظيم #

نبداء بغرفة النوم ::

1ـ وش افضل طريقة لترتيب الملابس في الدواليب ( داخليه ثياب البيت او ثياب العمل او أي نوع )؟؟

2ـ كيف اقدر استغل ادراج التسريحة والدواليب الصغيرة الي فيها والكمدينه باكبر قدر ممكن ؟؟

3ـكيف انظف الارضيه ( وكيف انظف السجاد)؟؟